وقالك اية ... قالك اه السكر هيبقى بعشرة جنيه وده الجزء الجديد من المسلسل الشهير اللى مكسر الدنيا "الغلاء الفاحش" تأليف وسيناريو وحوار واخراج الحكومة وبطولة التجار والمواطن الغلبان بعد ما تمت بحمد الله من كام سنة بدأت بالبيض وكان السبب انفلونزا الطيور وبعد كده الرز واللحمة فى موسم واحد وكانوا مكسرين الدنيا بسم الله ماشاء الله من غير حسد ولا اى حقد لا سمح الله والجديد بقى هو السكر. وطبعا يا مواطن يا اهبل منك له دى خطة محكمة من عند الحكومة الحلوة المسكرة بتاعتنا وفيها مصلحتنا قولتلولى ليه؟! اقولكم انا بقى ليه، هما قصدهم ان لما السكر يغلى يبدأ الناس يقللوا من استعماله واللى كان بياخد اربع ملاعق ياخد اتنين بس ويحترم نفسه ويبطل جشع وطمع وكمان ده هيؤدى ان احتمال الاصابة بمرض السكر يقل اللى بيؤدى للاصابة بامراض تانية وكل دول هيقلوا طبعا مش عشان خاطر سواد عيون الشعب انما عشان يخف عليهم شوية المصاريف والادوية والعلاج على نفقة الدولة ويعرفوا يبعتوا للدول الشقيقة (ومحدش يفهمنى صح فى كلمة شقيقة دى) عشان نساعدهم فى نكبتهم اللى جتلهم من عند ربنا.
بلدنا بتتقدم بينا ولازم السكر عشان محدش يقول حاجة وكمان عشان الشعب يخس شوية ويبطل رمرمة بقى وكل ما حد يتعب يقول نناشد السيد المسعول انه يوافق لنا بالعلاج على نفقة الدولة ولا السفر بره على نفقة الدولة برضه هى الدولة مورهاش غيركوا ولا اية انتوا مش واخدين بالكوا اننا تقلنا اوى على الحكومة ولا اية ... خف تعوم يا مواطن منك له
0 comments:
إرسال تعليق