المهم يا جماعة ربنا كرموا وقام من على الكرسى بعد ما لزق فيه وشاط واتحرق وريحته طلعت وفى فترة دورة برلمانية كاملة فضل يذاكر ويجتهد ويقرب من فلان ويعرف علان ويجامل تنتان لغاية ما وصل للرووس الصغيرة اللى تبقى بنات الراس الكبيرة وبقوا صحاب وحبايب وبيروحوا الجنينة سوا وقرروا انهم المرة الجاية هينزلوه الانتخابات وطبعا ادام هما اللى عملوا كده يبقى اكيد زعبولتنا هو اللى هيكسب اكيد ... اصوات ميتيين ولا اصوات صاحيين المهم انه هيكسب وخلاص ومحدش يدقدق.
الحج زعبولة بقى صاحب نفوذ ويعرف ناس على مستوى عالى وبقوا يا عينى الناس اللى على قدها بتوع المجلس المحلى ومجلس الرغيف الممسمر قاعدين يتمسحوا فيه وبمعرفته العطرة اللى وراها مصالح بالعبيط والتنطيط ودخله الحزب الكبير ابو كرانيش كتير وكمان عايز ينزل فى الانتخابات وبقى مسك العصاية من قفاها يعنى عضو فى المجلس المحلى لا واية كمان عضو فى مجلس الشعب يعنى لعب على كبير اوى يا معنمى عشان شغل المخدرات يبقى ملعلع ويبقى فل الفل.
ويا عينى بقى على زعبولتنا لما ينزلوا منافس من الجماعة اياها فى منطقته ولاول مرة ويا سلام عليهم بقى لما بيبتكروا طريقة جديدة للدعاية وتشجيع الشباب لاستخراج البطاقات التموينية قصدى الانتخابية وقال اية روح القسم طلع بطاقة ... هو ده اللى ناقص كمان بتتحايلوا علينا ننتخبكوا يبقى تجيبولنا البطاقات لحد عندنا وعليها عشرة جنية يا كده يا بلاش هو احنا اى حد ده احنا الشباب يا عمنا يعنى مستقبل البلد دى اللى مش باينله ملامح لان الشباب قربوا ينقرضوا فى حوادث الطرق. منافس الحج زعبولة بقى بدل ما يعلق صور له ويعلن عن نفسه مسرح ناس فى الشوارع تثبت الشباب وتقولوهم انتخبوا خير من يمثلكم عبده الزنخ هو الحل هو اللى هيخصلكم من الاكتئاب عشان بعد ما ننتخبوا هيفجر بكم اللجنة وابقوا ادعولوا بقى ربنا يخليه لينا وننشر الدعوة فى جميع انحاء مصر. ونقابلكم فى لجنة الانتخابات ومبروك مقدما للحج زعبولة وشركاه
0 comments:
إرسال تعليق