المواطن المصرى يعانى من شروخ وتعفن فى شخصيته لانه بقاله مية سنة موطورش نفسه فقولنا المواطن المصرى مش هيتبهدل تانى واه يانى يانى يانى مش هبقى متعفن تانى وبنفكر نعمله بنكهات مختلفة يعنى مثلا هنعمله بطعم مصر اللى هو بقى طعم الجمبرى وكمان الطعم الكبير اوى اللى بتتميز بيه مصر كلها وهو طعم الكوسة واللى هتأهل المواطن المصرى المترمم انه يخترق اى مصلحة حكومة وانه يتعين فى اى وظيفة هو بيحلم بيها ماهو كوسة بقى.
ليه مفكرناش فى ترميم الشعب المصرى ونعمل تجارب وابحاث ويبقى المواطن المصرى هو اللى يتعمل عليه التجربة اصل مفيش اى كائن حى فى نفس الخصائص الموجودة فى الكائن الحى الغريب العجيب اللى اسمه "مصرى" ... يعنى يشرب المياه بعبلها ولا يجراله حاجة، ياكل الخضار وفاكهة متغذية غذاء كامل وشامل على مياه اللى اسمه اية ده الصحى ولا يهزه اى شيئ طب مش بالذمة ده يبقى كائن خارق وكمان الخصائص والامكانيات مش حاجات جديدة موجودة من زمان اوى وبتتورث.
ومن خلال البحث والفحص والمحص الدقيق اللى معجون بالهواء النقسى الجميل بتاع بلدنا توصل العلماء الغلابة ان المصرى يجب ويجوز ترميمه وتصميمه من اول وجديد يعنى نسيب الواجهة زى ما هى ونلعب فى المكونات من جوا يعنى نشيل مخه نشحمه ونزيته بأفكار غير الموجودة ونرجعه تانى يعنى نقوله تكيف مع ظروفك وامورك والمكتوب عليك بس مش لدرجة انك تسكت وتعمل عبيط، يعنى بدل ما تقعد تصوت وتندب على حالك وتقول مجنونة ياقوطة خدها على مصحة نفسية وعالجها ومتخليهاش تعديك وتجننك انت كمان بدل ما تقول مش لاقى شغل ابتكر وشوف امكانيت واخترع منها شغلانة وعلى رأى الشاعر الكبير دوّر بنفسك جوا نفسك بدل ما تستلف من طوب الارض وتخلى الست الحاجة تبيع اللى وراها واللى ادامها عشان تاخد فلوكة لايطاليا طب ما تعمل بيهم مشروع فى بلدك وبلاش شحططة ومرمطة. بدل ما تقول انا لا يمكن اوصل وابقى حاجة قول انا جزء فعال فى البلد دى وانا اللى هصلحها وكل ده مع شوية اسمنت وخرسانة من عند عمو عز ورمل وعدد واحد سيراميك عشان تزحلق همومك وتديها سكة واقعد اسبوع فى الشمس هتبقى زى الفل وعن تجربة واللى يسأل يتوه
0 comments:
إرسال تعليق