فين القش يا حكومة؟

حد يصدق اننا بقينا فى نص شهر سبتمبر ومحدش فينا شم ريحة دخان حريق قش الرز .. الحكومة حرمتنا من الحاجة الحلوة اللى فى حياتنا اللى بنستنها من السنة للسنة عشان نفتح نفس الموضوع ونقول نفس الكلام ونسمع نفس الوعود بس فاكرين من كام سنة لما طلع وزير البيئة المبجل لما طلع وقلنا ان السحابة السودة هتنتهى على سنة 2010 اهم اهو الرجل صدق والمشكلة اتحلت وقطعوا دابر المشكلة خااااااالص، ازاى بقى ياجدع انهم منعوا المياه عن الاراضى الزراعية بالتالى الاراضى ماتت والفلاحين مش عارفين يزرعوا الرز واهى تبقى فايدة من كل النواحى قولى ازاى .. اقولك انا بقى ازاى:اولا: نوفر المياه اللى الرز كان بيبلعها بلع ربنا يسامحه مطرح ماراح.ثانيا: و ده بقى الاهم اننا نتخلص من السحابة السودة.ثالثا: اننا نحافظ على وزن المواطن المصرى اللى ضرب زى مواسير المياه.رابعا: اننا نوطى العلاقات السياسية والاقتصادية اللى بينا وبين الدول اللى هنستورد منها الرز.

بس سؤال بقى عمال يتنطط فى زورى ليه الرز مش هيجى بقشه "ابن عم مش بدوده" عشان منحسش بأى نقص وازاى حاجة زى دى تعدى على حكومتنا حبيبتنا دى حتى بتاخد بالها من الحاجات الصغيرة قبل الكبيرة ده حتى الواحد مبيحسش انه فى شهر تسعة الا لما بيشم ريحة القش وهو بيتحرق كده وبيزغرط فى النار .. يا سلااااااام ياولاد فين ايام السحابة السودة والله كانت ايام حلوة.

ده انا كل سنة لما كنت بشمها كنت بفتكر الذكريات الحلوة اللى كانت بتحصل لى كل سنة وانا شمها. محدش عارف قيمة السحابة السودة بالنسبة للناس اية ازاى مرض ينقص من قائمة الامراض المصرية الشهيرة يعنى: السرطان والسكر والضغط والفشل الكلوى ينقصه الربو والالتهاب الرئوى طب نعمل اية فى ادوية الامراض دى نرميها فى الزبالة يعنى وتخسر وتبوظ وميزانية الدولة تخرب مينفعش خالص اللى بيحصل ده. وعلى رأيى الزعيم الوطنى الكبير ياتوفروالنا الكولة ياتوفروالنا السحابة السودة واحنا لازم نعمل من اللى هى كده دى عشان الحكومة تستورد لنا القش عشان الحكومة تستورد لنا القش عشان نحرقه ونشم بقى. ولا اية ياجدعان؟!